Booktrailers

Imprescindible, valente e comprometido cos excluídos da sociedade, “Terra de ninguén”, con texto de María José Floriano e ilustracións de Federico Delicado, é un álbum que nos amosa unha realidade invisibilizada a través da mirada doce e creativa da infancia

“Fab, o monstro amarelo” é un clásico divertido de Carme Solé Vendrell protagonizado por unha simpática criatura que esquece as súas preocupacións para axudar os demais. Unha homenaxe ao ilustrador David McKee e a algúns dos seus personaxes máis queridos.

Con texto de Pilar Hurtado e ilustracións de Luisa Rivera, “O comedor da avoa” invítanos a sentar arredor da mesa para facer unha viaxe gastronómica polo mundo a través dos aromas, sabores e pratos representativos de varios países.

“Cos brazos abertos”, de Antonio Rubio e Maria Girón, preséntanos unha escola diversa e integradora, onde nenas e nenos de diferentes procedencias conviven felices e en harmonía. Un canto á esperanza dun mundo fraterno e igualitario, onde todas e todos temos cabida.

“Soños á beiramar”, con texto de Rosa Estévez Gantes e ilustracións de Rafa Antón, é o relato dunha divertida xornada de xogos e confidencias entre dúas amigas que comparten sentimentos e emocións.