No marco da 23.ª Campaña de Animación á Lectura de Kalandraka Editora, visitamos o CRA de Dodro, onde as nenas e nenos puideron gozar dunha sesión de contos e de música da man do artista Paco Nogueiras. Grazas pola vosa acollida e felices lecturas!

“Moi preto dun bosque vivía unha nena á que lle chamaban Rizos de Ouro...” Olivier Douzou é o autor do álbum “Rizos de Ouro e os tres osos”, unha adaptación moderna e innovadora do conto clásico, cargada de humor e creatividade.

“Edadrebil. 7 contos e 1 espello”, con texto de Miquel Obiols e ilustracións de Miguel Calatayud, está considerada na LIX como unha das mellores obras do século XX. Sete extraordinarias viaxes a través da fantasía que convidan a ler, mirar, xogar e imaxinar.

Na véspera do Día das Letras Galegas compartimos o videoclip de “O rap da lingua”, de Migallas Teatro. Esta canción forma parte do libro-disco “Canta connosco!”, ilustrado por Óscar Villán e publicado por Kalandraka.

“Verme” é o novo libro interactivo en formato acordeón dos autores de “Balea”, Federico Fernández e Germán González, que nos presenta un moderno aparello perforador dirixido por uns divertidos operarios. A mellor forma de viaxar polas profundidades da Terra!

No 112.º aniversario do nacemento de Leo Lionni, compartimos o booktrailer da súa obra “Unha cor propia”, fábula contemporánea sobre as aventuras dun camaleón na procura da súa identidade.

O próximo 13 de maio finaliza o prazo para o envío de obras ao Premio Internacional Compostela de Álbums Ilustrados. Consulta as bases na web e anímate a participar!

A compañía Migallas Teatro celebra mañá o seu 30.º aniversario. Grazas pola vosa xenerosidade ao longo destas tres décadas. Parabéns e que veñan moitos máis!

“Despois do diario de Anne Frank”, de Bas von Benda-Beckmann, é un estudo histórico pioneiro sobre o destino das oito persoas agochadas na Casa de atrás e o seu paso polos campos de exterminio nazis. Unha forma de manter viva a memoria para que a historia non se repita.

O 2 de abril conmemórase o Día Internacional do Libro Infantil e Xuvenil. Para celebrar esta data, recomendamos a lectura das divertidas aventuras de Pippi Mediaslongas, un clásico imprescindible con texto de Astrid Lindgren e ilustracións de Ingrid Vang Nyman.